الثلاثاء، 4 مارس 2014

قرض





الحياة صعبة والعيال طلباتهم كثيرة


أكل وشرب وملابس وظروف مالنا فيها حلية


نكد ونتعب ندور الرزق بكل وسيلة


ماني فقير ولاغني لكني رجل مؤمن بربه وتدبيره


نشتغل في الصبح في البطحاء وبعد العصر في غبيرة*


يخلص الراتب في أول أسبوع


وتبدأ المعاناة وطريق مالنا عنه رجوع


أشوف الحيتان تصرف بهبل وقلبي منهم موجوع


أبغى أعيش لكن مو بطريق غير مشروع


قانع بعيشتي وراضي وصابر حتى لو كنت موجوع


طفت الدنيا طول وعرض


وسألت قالوا مالك إلا تاخذ قرض


رح للبنك الفلاني تراه مسوي كم عرض


دين يفك أزمتك وتشتري بيت والا أرض


قلت مالها إلا هي والظاهر إنه بيكون فرض


جيت للبنك وأنا أقول يارب يوافقون


قابلت الموظف وهو يطالعني بالعيون


قال هلا بك أكيد مواطن ومديون


إحنا لك جاهزين لو تبي مليون


قلت أبي عونكم لكن وش لون؟؟


قال بسيطة أوراق وتواقيع وبعدها إنت تمون


قلت حاضر عجل ترى الوضع خطير


ماعاد أقدر أتحمل الأمر واللي يصير


أبي أشتري لي أرض والا بيت صغير


وأعيش مرتاح وأغني مثل العصافير


ناظرني بخبث وكأنه يقول والله إنك مهبول






أحد يدخل المصيدة برجله معقول؟؟


تظن إنك بتفرح وماتدري إنك صيدة مثل باقي الخبول


بتفرح باكر وبعدها بتكون بكلبشتنا موصول


خلصت الأواراق


والدراهم زادت لها الأشواق


والصبر على وضعي ماينطاق


راتب يطير أول الشهر ويدور الفراق


وافق البنك وبلغوني


تعال خذ قرضك يانظر عيوني


أمس إنت طفران واليوم لنا مديوني


راتبك عندنا نتحكم فيك ولاتقول فكوني


وقعت في السنارة والله علينا يعينكِ


وين ماتروح ترانا ملاحقينك


بيخلص قرضك وبتدورنا من جديد واحنا ناطرينك


حلقة مالها مخرج ومن زود غلاك ترانا شارينك


مسكين إنت كان ظنيت إننا راحمينك


خلص القرض الأول


ورجعت بين البنوك أتجول


قالوا مانعطيك حتى راتبك لنا تحول


قلت مرهون قالوا أجل توكل على الله وخلك مثل أول.


***




فهد



الخميس 14/3/32هـ 17/2/2011م



العاشرة صباحا



الرياض

ليست هناك تعليقات:

إرسال تعليق