أقبل شهر الصوم بخيراته
والغلبان بدأ يجمع مصروفاته
الشهر كله خير وحسنات
والحرامية يزيدون أرصدتهم مليارات
السوق مليان خيرات وبضايع
والمواطن غلبان بين الحرامية ضايع
هنا سوق تعلن عن عروض كبيرة
أسعار خاصة للمستهلك ماهي لغيره
كل مشترواتك عندنا بسعر خاص
نخفض لك أغراضك بعد الغلا تلاقيها رخاص
يستغفلوننا بكل براعة
وكل تاجر حرامي تزيد أطماعه
مايهمه المواطن الغلبان
لو ما إشترى مقاضي رمضان
يموت والا يتسلف
كله واحد المهم تجارته ماتتلف
ماندري وش نسوي مع وزارة التجارة
هم صدق يراقبون السوق والا شغلهم كله عيارة
تصاريح مسئولين كل يوم في الجرايد
بنوقف جشع التجار وهم خراطهم زايد
وإحنا مساكين نصدق كلامهم
نقول يخافون علينا وماندري إنهم يبيعونا أحلامهم
تسأل عن البضايع وأسعارها
وتشوف الزيادة تحرقك بنارها
تجول بين الأسواق تبي توفر ريال
ينفعك تشتري به ملابس العيد للعيال
مصيبة كيف هالبشر عايشين
نهب وسرقة لجيب المواطن المسكين
مايهمهم حلال وإلا حرام
يشبعون وإنت على الوهم تنام
اللهم ياكريم يالطيف بعبادك
تغنينا عنهم وترزقنا من حلال زادك
لك الله ياغلبان هو من يلطف بك
يغنيك عنهم لأنه رحيم ويحبك
***
فهد
الأربعاء 19/8/32هـ 20/7/2011م
الساعة الحادية عشر والنصف صباحاً
الرياض
ليست هناك تعليقات:
إرسال تعليق